Istituzions e Normative

Cheste sezion e cjape dentri lis Leçs pe lenghe furlane, vâl a dî lis leç regjonâls buridis fûr e fatis buinis dal Consei Regjonâl tal 1996 e tal 2007. I percors che a àn puartât ai tescj legjislatîfs definitîfs a àn viodût l’interessament di Comissions Consiliârs e di Grups di lavôr metûts dongje di pueste; chescj percors no son simpri stâts sempliçs e lis discussions, ancje tal câs de ultime leç, la 29/2007, a son ladis indenant par mês su posizions difarentis di bande no dome de part politiche, ma ancje dal mont de scuele, de comunicazion, des associazions e des istituzions. Cualchi mês dopo de aprovazion de leç 29/2007 e je rivade ancje la impugnazion di bande de Cort Costituzionâl e chenti si pues lei la Sentence n. 159 dai 22 di Mai dal 2009.
Tal spazi dedicât al OLF ARLeF (Osservatori regjonâl de Lenghe e de culture Furlanis e Agjenzie Regjonâl pe Lenghe Furlane) si à la gjenesi de nassite di chescj organisims, si lein i orghins che ju componin, i compits e i setôrs di intervent, i presidents e i membris dal Consei di Aministrazion e dal Comitât Tecnic Sientific. L’OLF nassût tal 1998 daûr dal articul 15 de Leç Regjonâl 15/1996 al è stât sostituît tal 2004 de ARLeF cul articul 4 de Leç Regjonâl numar 20/2004.
In Normative e diretivis a son a disposizion i documents e lis indicazions che a son vignudis fûr dal lavôr de Comission Obietîf Didatics e dal Comitât Tecnic Sientific dal OLF e de ARLeF. Chestis diretivis a son une vore impuartantis par cui che al à a ce fa ogni dî cu la lenghe furlane in setôrs difarents: di chel di fonde che al rivuarde la grafie e la normalizazion, a chel de didatiche, cence dismenteâ la cuestion de toponomastiche.