Moderne 1600-1800

La dade di timp in chest câs e cuvierç sù par jù dusinte agns. I doi autôrs che a vegnin presentâts par cumò tes sotsezions a son Ermes di Colorêt e Eusebi Stele.
La lenghe dialetâl tal 1600 e ven considerade tant che une des tantis pussibilitâts ufridis al poete par fâ viodi il so estri di creatôr, e al è un secul di produzion bondante e di nassite di circui leteraris. No son distancis jenfri lenghe taliane e dialet: di fat ancje i modei de leterature nazionâl a vignaran incuadrâts tal dialet cence vignî mudâts o ridûts. La produzion leterarie e devente motîf par mostrâ l’inzen di cui che al scrîf e e devente ogjet “di consum” dome par personis di classe sociâl alte. In cheste ete si disvilupe la Brigade Udinese, un circul fat di predis, avocats, nodârs che a cirin di realizâ une produzion elaborade, alte cun l’ûs di figuris retorichis e che a scrivin di tematichis amorosis, di episodis di croniche peâts al amôr te suaze de citât di Udin e ancje di altri. A doprin variazions dal teme, par stuzigâ la maravee di dal letôr, ur interesse plui la forme che il contignût.
Tal ‘600 il Baroc si mostre in Ermes di Colorêt e Eusebi Stele cun realizazions difarentis su argoments variis (contrascj jenfri contadins, carnevâl e cuaresime, massariis, om e femine, amôr tratât in maniere serie e matarane, religjon, componiments di caratar morâl e filosofic, popolâr che al tint al mataran, di celebrazion e eroics); di chest si cjate esempli tes sotsezions.
Il ‘700 al è il secul des produzions pordenonesis e gurizanis par furlan e in chest secul si cjate il prin esempli di scriture feminine, chê di Teresa Zai, une muinie che e scrîf doprant talian, furlan e venit.
Tal complès al è un periodi puar di produzion leterarie e si siere cui lunaris e i strolics che a varan fortune tal ‘800, e cu la produzion dai fradis Mariuzza.
Tal ‘800 i nons plui impuartants tal panorame leterari par furlan a son Pieri Çorut e Catine Percude.
Çorut al publiche il gjenar dal Strolic che i da notorietât e bêçs, cence un fin leterari clâr, stant che la int e à gust di savê lis lunis, lis fiestis, i marcjâts e tal stes timps e vûl ancje ridi e divertîsi leint la satire che si cjate jenfri une prevision e chê altre. Sì che duncje l’autôr al scrîf par interès economic. I siei personaçs tes satiris a son stereotips: i vizis, l’infedeltât, la sflacje. Fuarte tai siei componiments e je la critiche cuintri des feminis.
I lunaris che a nassin tal teritori gurizan, a diference di chei di Çorut a son di caratar plui gjornalistic, sagjistic e didatic. Un esempli al è Il Contadinel e su lis pagjinis di chest e fâs il so debut Catine Percude. Sul Contadinel e scrîf saçs su la vuarzine mecaniche, su la jerbe rave cun chê di insegnâ ai contadins che invezit e jerin stâts piturâts in maniere stereortipade sedi di Ermes di Colorêt che di Pieri Çorut. E je une vore atente a la educazion pai fîs dai contadins e pes frutis tant che e met sù ancje une piçule scuele. Lis sôs contis (e je la prime autore che e scrîf une prose narative par furlane) a àn caratar pedagogjic e a ufrissin modei di compuartament, li che lis protagonistis a son feminis. Dongje dai personaçs feminins e masculins positîfs a son ancje chei negatîfs che a coventin par meti in vuaite cui che al lei. La autore e tire dongje materiâl de tradizion orâl che po dopo e met dentri tes sôs produzions leterariis.
Dal pont di viste linguistic sedi Çorut che la Percude, par motivazions difarentis (un par interès economic, chê altre par motivazions didatichis) cun chê di vê un public larc, a sielzin une varietât di furlan centrâl, medi e capît di ducj, che e je chê di riferiment po dopo pe definizion de coinè che e je ae fonde de grafie uficiâl.
Sul finî dal ‘800, jenfri il 1860 e il 1890, si disvilupe la ricercje su lis testemoneancis orâls cuntun interès di bande di Giovanni Gortani, Valentino Ostermann e Adolfo Zorzut e in chescj timps a nassin ancje lis vilotis furlanis dal Arboit. In plui de passion pal mont popolâr e je ancje chê pe lenghe furlane che in chest periodi e cjate disvilup tai studis di Graziadio Isaia Ascoli che al realize i “Saggi ladini” e tal vocabolari dal abât Jacopo Pirona.