Contemporanie 1900-2000

In chest câs si cjape in considerazion un secul dongje di nô e un periodi che al podarès slungjâsi fin in dì di vuê. I nons che si cjatin tes sotsezions a son chei di Novella Cantarutti, Pierluigi Cappello, Angelo Michele Pittana – Agnul di Spere, Dino Virgili. Tal XX secul si è disvilupade, dongje de poesie, ancje la prose cun romançs e contis nassudis de fantasie e des penis di autôrs che a partignivin a grups tant che chel di Risultive, de Academiuta di lenga furlana, dal grup da La cjarande (*Aurelio Cantoni*, Otmar Muzzolini – Meni Ucel, Alan Brusini, Riedo Puppo, Maria Forte, Pier Paolo Pasolini, Domenico Naldini, Nadia Pauluzzo, Ovidio Colussi dome par fâ cualchi non e tancj altris). Altris po dopo a son ancje: Amedeo Giacomini, Elio Bartolini, Gianni Gregoricchio. In dì di vuê oltri Pierluigi Cappello ancje Federico Tavan, Franco Marchetta, Maurizio Mattiuzza e v.i.
A son nassûts in chescj ultins 30 agns cetancj premis, peâts a concors leteraris, e zontraviers chescj si pues ancje misurâ il stât de leterature furlane che e rive a esprimisi ancje in gjenars particolârs tant che chel dal zâl o chel de traduzion, in plui di chel dal romanç, de conte curte o lungje, de poesie, dai tescj teatrâi (jenfri i plui cognossûts a son il “Premi San Simon” dedicât a Agnul di Spere, il “Premi Renato Appi”, il “Premi Gjiso Fior”, il “Premi Zâl par furlan”, il “Premi Malattia della Vallata”).
Il stât de leterature in marilenghe, in dì di vuê, li che no esistin scuelis o grups leteraris uficiâi, si misure ancje oltri i concors di pueste; di fat in rivistis tant che “La Comugne” o in blogs tant che “Contecurte” a vegnin fûr autôrs e mûts di scrivi gnûfs, spontanis e ancje li si pues fâ une analisi di formis, gjenars, contignûts e lengaçs doprâts tai tescj scrits prodots.
E esist po dopo ancje une leterature sientifiche che e à scomençât a produsi tescj che a fevelin di siencis e di tecnologjie cun lessic setoriâl specific, e ancje une “leterature piturade”, chê dai fumuts.
Al moment i autôrs tes sotsezions di cheste categorie Contemporanie 1900-2000 a son cuatri.