Scuele furlane

Un dai setôrs fondamentâi di cjapâ in considerazion tal meti jù e svilupâ une politiche linguistiche, soredut par une lenghe minoritarie come che e je chê furlane, al è dal sigûr chel de scuele. L’insegnament des lenghis mancul pandudis tes lôr comunitâts di partignince al permet la alfabetizazion dai fevelants, ven a stâi la capacitât di imparâ a lei e scrivi e chest al à une schirie di efiets positîfs tal consolidâ la cussience di doprâ une lenghe buine di jessi un imprest efetîf di comunicazion in cualsisedi suaze e in cualsisedi maniere. Si rivarà cussì a rinfuarçâ setôrs tant che chei de produzion leterarie e de informazion, dome par dînt doi.
In Legjislazion e programs a son documents, riferiments e informazions che a dan un cuadri des normis pal insegnament e a ufrissin indicazions indreçadis a dirigjents scolastics e insegnants che a àn di prontâ programs e ativitâts didatichis daûr, juste apont, des leçs. Impuartantis ancje lis propuestis fatis di esperts dal setôr metûts dongje dentri te Comission Obietîfs Didatics OLF – ARLeF che a marchin necessitâts e a proponin metodis par meti in vore lis leçs in materie o par inviant di gnovis specifichis.
La sezion dedicade a lis Unitâts didatichis e devente un lûc virtuâl di scambi di esperiencis fatis doprant la lenghe furlane tal insegnament veicolâr. Cu lis indicazions dadis e je ancje la pussibilitât di predisponi i progjets in maniere di mandâju al CFL2000 che po dopo ju met a disposizion in cheste sezion. La condivision e permet di cjapâ tant che esemplis esperiencis fatis e di meti in circul lis buinis pratichis.
La Comission pai obietîfs didatics COD-ARLeF inviade tal 2003 dentri tal OLF e je stade confermade tal 2005 tal ARLeF. Di chest grup di lavôr, fat di esperts dal setôr, a son vignudis fûr propuestis e liniis vuidis buinis pal insegnament in marilenghe. Chenti si pues discjamâ il materiâl prontât de Comission stesse.