Leterature furlane

La leterature furlane e à une lungje storie. I prins documents scrits tune variant volgâr, identificade dopo tant che lenghe furlane, a son dal XII secul. Si trate di cjartis di munistîrs e confraternitis, di ats di nodârs, di esercizis di traduzion che a vignivin fats soredut tes scuelis par nodârs di Cividât.
Tal mieç dal XIV secul e comparìs la poesie furlane cun contignûts e formis stilistichis che no si jerin mai cjatadis in Friûl. Al è di li che e nas une leterature siore che e je stade prodote in maniere continue par secui, traviersantju e rivant fin tal tierç mileni.
Al moment chenti a son presintis dôs sezions: Moderne 1600-1800 e Contemporanie 1900-2000. In chescj doi grups si cjatin lis biografiis di cualchidun dai autôrs plui rapresentatîfs dal periodi cjapât in considerazion e i lôr tescj che a vegnin presentâts sedi te forme grafiche origjinarie che in chê normalizade.
Tai tescj a vegnin fûr stîi difarents, peraulis che a partegnin a plui varietâts, gjenars svariâts, scrits di autôrs che a doprin il furlan tant che lenghe prime par pandi pensîrs, sintiments, riflessions, par contâ storiis, par descrivi mûts di jessi, par esprimi concets alts e par voltâ ce che altris a àn scrit tes lenghis forestis.