Unitâts didatichis

Si proponin chenti unitâts didatichis che a puedin sei discjariadis e dopradis dai insegnants che a insegnin la lenghe furlane ai arlêfs tes lôr scuelis. E je une grande bisugne di tescj in lenghe furlane, di cualsisei dissipline, e di manuâi che a permetin di insegnâ la lenghe furlane e te lenghe furlane.
In chescj agns si son preparadis tes scuelis o tai cors che si son fats putropis voris pal insegnament de lenghe furlane. Ma nome une part di chês voris e je stade publicade, e ancje la part publicade no pues contâ suntune distribuzion sistematiche par dutis lis scuelis dal Friûl. Al sarès un ben che lis esperiencis che si fasin di une bande a deventassin patrimoni di dutis lis scuelis. In grazie de difusion in rêt al è pussibil meti a disposizion di ducj ce che di bon si fâs, cuntune spese une vore limitade.
Cheste subsezion dal sît web dal CFL2000 e je pensade par vignî incuintri a la bisugne.

Lis unitâts didatichis che si proponin chenti a àn di vê ciertis carateristichis: a àn di vê une struture minime comune, che e je fate

  1. de indicazion di obietîfs principâi e secondaris (necessarie),
  2. des indicazions metodologjichis par davuelzi la esperience didatiche,
  3. des indicazions metodologjichis par davuelzi lis verifichis di aprendiment,
  4. di un glossari de unitât, massime se si trate di contignûts dissiplinârs che a domandin un lessic tecnic specialistic,
  5. dai contignûts o argoments che a son ogjet de unitât.

La lenghe des unitâts e à di sei la lenghe furlane, te sô forme comune normalizade. Il lessic al à di sei coerent e apropriât, il miôr che al è. Nome cussì lis esperiencis di une scuele a puedin deventâ model di didatiche e di lenghe par dutis chês altris.

Si proponin chenti ancje saçs e notis che a rivuardin la didatiche de lenghe furlane.

Par distingui lis unitâts didatichis dai saçs o notis su la didatiche, si doprin siglis di pueste inte indicazion dai files:

  1. par indicâ une unitât didatiche si scrîf UDD NNN Nonfile, dulà che la prime sigle UDD e significhe unitât didatiche, la seconde e varie e e sta pal non dal autôr o de scuele che le à preparade; la tierce indicazion e je il titul propri de vore;
  2. par indicâ un saç o une note su la didatiche, si scrîf NOT NNN Nonfile, dulà che la prime sigle e significhe note, e chês altris indicazions compagn che sore.