CFL2000

Cheste e je la sezion dedicade par intîr al CFL2000, li che si gjavin elements bogns par capî ce che al è chest Consorzi e soredut ce che al fâs.
Si cjatin te Struture informazions sul Statût (sedi te version taliane che ta chê furlane) cui compits, i obietîfs e i parcês che a àn puartât a la formazion di chest Consorzi che al cjape dentri i Ents e lis Istituzions che di agns a son ponts di riferiment te cuestion de lenghe e de culture furlane. Te pagjine dedicade ai Socis al è l’elenc di ducj chescj e ognidun, scliçant parsore, al mande tal so sît (tal câs che indi vedin un).
Tal Organigram par anadis si lein i nons dai components dal Consei di Aministrazion dal Consorzi dal moment de sô istituzion fin cumò. Ogni Consei al dure in cjarie 3 agns e al à dentri personis che a partegnin a un dai socis dal CFL2000 o che dut câs a lavorin tal cjamp de lenghe furlane.
Par ultimis, ma no ultimis, si cjatin lis Ativitâts par anadis puartadis indenant dal Consorzi in chescj agns di lavôr. La plui part dai progjets a son leâts a la realizazion dal Grant Dizionari Bilengâl Talian-Fulan: opare grandonone e impuartante che propit pe sô complessitât e à domandât un impegn fuart dal pont di viste linguistic e informatic. Lis fuarcis, lis energjiis e i finanziaments vûts dal CFL2000 a àn puartât a realizâ un prodot che al è stât preseât fintremai de Universitât di Stocolme e di chê di Macerate che cumò lu cjapin tant che model par preparâ, propit cu la colaborazion dal CFL2000, voris di cheste fate.